Zelensky ataka mazungumzo ya moja kwa moja na Putin

Rais wa Ukraine Volodymyr Zelensky ameongeza msukumo mpya wa kutaka kufanyika kwa mazungumzo ya moja kwa moja na Rais wa Urusi Vladimir Putin, akisema hatua hiyo inaweza kuwa njia muhimu ya kujaribu kumaliza vita vinavyoendelea kati ya nchi hizo mbili.

Kupitia waraka wake wa wazi aliomwandikia Putin, Zelensky amesisitiza umuhimu wa viongozi hao kukutana uso kwa uso ili kujadili namna ya kurejesha amani ya kudumu. Amesema kuwa suluhisho la kweli linaweza kupatikana endapo kutakuwa na mazungumzo ya moja kwa moja kati ya Kyiv na Moscow, bila kucheleweshwa.

Katika maelezo yake yenye maudhui marefu, Zelensky ameeleza kuwa si busara kusubiri mataifa mengine, hasa Marekani, kuendelea kuipa kipaumbele vita vya Ulaya wakati yakikabiliana na migogoro mingine ya kimataifa, ikiwemo masuala ya Mashariki ya Kati.

Aidha, amependekeza kuwepo kwa usitishwaji wa mapigano kwa muda wote wa mazungumzo hayo ili kuandaa mazingira salama na mazuri ya kufikia makubaliano ya amani.

Hata hivyo, upande wa Urusi umekuwa na msimamo tofauti, ambapo Putin amewahi kueleza kuwa kusitisha mapigano kwa muda si rahisi kwa sasa, akisisitiza kuwa bado kuna hoja muhimu zinazohitaji kujadiliwa kabla ya kufikia makubaliano yoyote ya mwisho.