Serikali yazungumzia hatua mpya kudhibiti bei ya mafuta nchini

Waziri Mkuu Mwigulu Nchemba amesema Serikali itaendelea kuhakikisha upatikanaji wa mafuta ya petroli na mafuta mengine nchini unakuwa wa uhakika ili kudhibiti mabadiliko ya bei yanayoendelea kushuhudiwa.

Amesema hatua hiyo inalenga kuhakikisha bei za mafuta zinabaki kuwa nafuu kwa wananchi, licha ya changamoto za kiusalama katika baadhi ya maeneo ya kikanda na kimataifa, ikiwemo hali ya Mashariki ya Kati ambayo imechangia kupanda kwa gharama za bidhaa hiyo.

Akiwasilisha Makadirio ya Mapato na Matumizi ya Serikali kwa mwaka wa fedha 2026/2027 Bungeni Dodoma, Waziri Mkuu huyo alibainisha kuwa Serikali itakaa pamoja na kupitia mikakati ya ziada ya kukabiliana na ongezeko la bei ili kupunguza athari kwa wananchi na gharama za maisha.

Aidha, Serikali imeendelea kuimarisha mifumo ya uagizaji, uhifadhi na usambazaji wa mafuta pamoja na kuongeza uwezo wa bandari mbalimbali kupokea bidhaa hiyo.

Alifafanua kuwa Serikali inaendelea na utekelezaji wa mradi wa ujenzi wa ghala kubwa la kuhifadhi mafuta katika Dar es Salaam Port lenye uwezo wa kuhifadhi tani 308,110, ambapo utekelezaji wake umefikia asilimia 30, hatua inayotarajiwa kuimarisha usalama wa upatikanaji wa mafuta nchini.

Serikali pia imeeleza kuwa inaimarisha miundombinu katika maeneo ya bandari na uhifadhi ili kuhakikisha nchi ina uwezo wa kujikinga na mishtuko ya upatikanaji wa mafuta katika soko la dunia.